24 noyabr 2024
24 noyabr 2024-cü il tarixində Azərbaycan Musiqi Mədəniyyəti Dövlət Muzeyinin filialı olan Qara Qarayevin Ev Muzeyində "İRƏLİ" Mədəniyyət Mərkəzinin birgə təşkilatçılığı ilə yeni "Solo gənclik" layihəsi çərçivəsində bəstəkar, pianoçu Nigar Süleymanla görüş və onun təqdimatında ilk konsert keçirilmişdir.
Nigar Süleyman Bülbül adına orta ixtisas musiqi məktəbində dirijorluq, bəstəkarlıq və nəzəriyyə ixtisasları üzrə təhsil alıb. Daha sonra Üzeyir Hacıbəyli adına Bakı Musiqi Akademiyası və Estoniya Musiqi və Teatr Akademiyasında bəstəkarlıq ixtisası üzrə təhsilini davam etdirib. Bir çox yerli və beynəlxalq festivalların, müsabiqələrin iştirakçısıdır.
Konsertdə Nigar Süleyman öz bəstələri ilə yanaşı görkəmli Azərbaycan bəstəkarları Qara Qarayevin, Vaqif Mustafazadənin əsərlərindən ibarət musiqi proqramı ilə çıxış etdi, tədbir iştirakçılarının suallarını cavablandırdı.
Azərbaycan Musiqi Mədəniyyəti Dövlət Muzeyinin direktoru, sənətşünaslıq elmləri doktoru, Əməkdər mədəniyyət işçisi Alla Bayramova gənc istedadı təbrik edib ona yaradıcılıq uğurları arzu etdi, muzeyin nəşri olan "Qara Qarayev. Dram tamaşalarına musiqidən fraqmentlər" not məcmuəsini ona hədiyyə etdi.
Layihənin həyata keçirilməsində əsas məqsəd gənclərin mədəni iştirakçılığının artırılması, musiqi mədəniyyətinin inkişafına töhfə vermək və istedadlı gənclərin fəaliyyətinin stimullaşdırılmasına nail olmaqdır.
 Tədbirlər
|
|
