22 oktyabr 2024
22 oktyabr 2024-cü il tarixində Azərbaycan Musiqi Mədəniyyəti Dövlət Muzeyində "İrsimizin Tədqiqi və Təbliği" İctimai Birliyi təşkilatçılığı ilə görkəmli bəstəkarlar, xalq artistləri Şəfiqə Axundova, Süleyman Ələsgərov və tarzən Xalq artisti Əhsən Əadaşovun 100 illiklərinə həsr olunan "Musiqi Aləmində" jurnalının yeni sayının təqdimatı keçirilmişdir.
Azərbaycan Musiqi Mədəniyyəti Dövlət Muzeyinin direktoru, sənətşünaslıq elmləri doktoru, Əməkdar mədəniyyət işçisi Alla Bayramova giriş sözü ilə çıxış etmişdir. Daha sonra söz tədbirin aparıcısı "Musiqi aləmində" jurnalının redaktoru və təsisçisi, sənətşünaslıq üzrə fəlsəfə doktoru, Əməkdar mədəniyyət işçisi Səadət Təhmirazqızına verilmişdir.
Tədbirdə Əhsən Dadaşovun qızı, pianoçu Xanım Məhərrəmova, musiqişünas, sənətşünaslıq üzrə fəlsəfə doktoru Mehparə Rzayeva, Bakı Musiqi Akademiyasının dosenti, sənətşünaslıq üzrə fəlsəfə doktoru Nuridə İsmayılzadə, Xalq artisti Gülyaz Məmmədova, S.Ələsgərov adına 1 nömrəli Uşaq İncəsənət Məktəbinin direktoru Vaqif Abbasov,"Carçı" jurnalının baş redaktoru Gülnarə Əmirquliyeva bu il 100 illik yubileyləri qeyd olunan görkəmli bəstəkarlar: Xalq artisti Süleyman Ələsgərov (22.02.1924-21.01.2000), Xalq artisti Şəfiqə Axundova (21.01.1924-26.07.2013) və görkəmli tarzən, Xalq artisti Əhsən Dadaşovun (16.08.1924-30.05.1976) yaradıcılıq yolu, musiqi mədəniyyətimizin inkişafında, zənginləşməsində əvəzsiz xidmətləri haqqında çıxış etmişlər.
Bütün çıxışlar Azərbaycan Musiqi Mədəniyyəti Dövlət Muzeyinin zəngin arxiv materialları əsasında hazırlanmış və Şəfiqə Axundova, Süleyman Ələsgərov və Əhsən Dadaşovun həyat və yaradıcılıq yolunu əks etdirən slayd-şou ilə müşayiət olunmuşdur.
Tədbirin bədii hissəsində Xalq artisti Gülyaz Məmmədova, Əməkdar artist Fəridə Hüseynova (f-no), Sunay Hacıyeva (vokal), Əşrəf Bünyadzadə (vokal), Mirnofəl Həsənov (tar), S.Ələsgərov adına 1 nömrəli Uşaq İncəsənət Məktəbinin müəllim və şagirdləri: Qurban Nəsirli (violin), Aytən Cavadova (f-no), Əli Sərkərli (qarmon), Tünzalə Qəhramanova (f-no) və Mollağa Əliyevin (nağara) ifalarında Şəfiqə Axundovanın, Süleyman Ələsgərovun əsərlərindən ibarət musiqi proqramı, videoçarx təqdim olunmuşdur.
 Tədbirlər
|
|
