19 oktyabr 2024
M.Y.LERMONTOV - 210
19 oktyabr 2024-cü il tarixində Azərbaycan Musiqi Mədəniyyəti Dövlət Muzeyində Bakıdakı Rus Evinin (RİMM) təşkilatçılığı ilə görkəmli rus şairi, yazıçı və dramaturqu M.Y.Lermontovun 210 illiyinə həsr olunmuş ədəbi-musiqili tədbir keçirilmişdir.
Tədbirdən əvvəl qonaqlar Rusiyanın "Tarxanı" Dövlət Muzey-Qoruğunun hazırladığı M.Y.Lermontovun tərənnüm etdiyi mənzərə tablolarından ibarət sərgi ilə tanış oldular.
Azərbaycan Musiqi Mədəniyyəti Dövlət Muzeyinin direktoru, sənətşünaslıq elmləri doktoru, Əməkdar mədəniyyət işçisi Alla Bayramova giriş sözü ilə çıxış etdi.
Tədbirdə Bakı Xoreoqrafiya Akademiyasının müəllimi Nigar Mirzəzadə (aparıcı), Yasamal rayonu Mərkəzləşmiş Kitabxana Sisteminin direktoru Lətifə Məmmədova, Lermontovun yubileyinə həsr olunmuş "Qafqazın poetik abidəsi" kitabının müəllifi, yazıçı-publisist Reyhan Mirzəzadə, AMEA N.Gəncəvi adına Milli Azərbaycan Ədəbiyyatı Muzeyinin tərkibində Sergey Yesenin adına Azərbaycan-Rus Ədəbi Əlaqələri Mərkəzinin rəhbəri, filologiya üzrə fəlsəfə doktoru Natəvan Mustafayeva, Azərbaycan Dövlət Pedaqoji Universitetinin professoru, filologiya elmləri doktoru Leyla Vəzirova, tədbirin bədii rəhbəri Azərbaycanın rusdilli təhsil müəssisələrinin müəllimlərinin assosiyasiyasının sədri, Bakıdakı Rus Evinin maarifləndirmə proqramlarının koordinatoru Lyubov Yakunina M.Y. Lermontovun yaradıcılığı, şairin Qafqaz həyatı haqqında çıxış etdilər.
Tədbirin bədii hissəsində "Günay" Uşaq Teatrı tərəfindən ədəbi-bədii kompozisiya təqdim olundu, Azərbaycan Dövlət Akademik Musiqili Teatrının solisti Yuliya Heydərova (vokal), Bakı Musiqi Akademiyasının baş müəllimi Alyona İnyakina (f-no), Ü.Hacıbəyli adına Bakı Musiqi Akademiyasının vokalçısı və konsertmeysteri Yelena Yakubovskaya (vokal), Əminə Əxmədova (vokal) şairin sözlərinə yazılmış romanslar ifa etdilər. Tədbirdə gənc aşıq Məhəmməd Muradov aşıq havası ifa etdi. M.Y.Lermontovun yaradıcılığına həsr edilmiş qiraət nümunələri və videoyazılar təqdim olundu.
 Tədbirlər
|
