2 oktyabr 2024
2 oktyabr 2024-cü il tarixində Azərbaycan Musiqi Mədəniyyəti Dövlət Muzeyinin filialı olan Qara Qarayevin Ev Muzeyində Klassik Musiqi Həvəskarları Klubunda tanınmış bəstəkar, Bakı Musiqi Akademiyasının professoru, Əməkdar incəsənət xadimi, Qara Qarayev bəstəkarlıq məktəbinin yetirməsi Aydın Əzimovla görüş keçirilmişdir.
Azərbaycan Musiqi Mədəniyyəti Dövlət Muzeyinin direktoru, sənətşünaslıq elmləri doktoru, Əməkdar mədəniyyət işçisi Alla Bayramova giriş sözü ilə çıxış etmişdir. Muzeyin şöbə müdiri Xanım Abdinova Aydın Əzimovun yaradıcılıq yolu, pedaqoji fəaliyyəti, istedadlı gənclərə qayğı və dəstəyi haqqında məlumat vermişdir. Onların çıxışı muzeyin zəngin arxiv materialları əsasında hazırlanmış slayd-şou ilə müşayiət olunmuşdur. Tədbirdə bəstəkar, Azərbaycan Milli Konservatoriyasının professoru, Əməkdar incəsənət xadimi Məmmədağa Umudov həmkarına ürək sözləri ilə çıxış etmiş, böyük yaradıcılıq uğurları diləmişdir.
Görüş zamanı Aydın Əzimov təhsil illəri, müəllimi Qara Qarayev haqqında xoş xatirələri, əldə etdiyi nailiyyətləri, yaradıcılıq planları haqqında danışmış, tədbir iştirakçılarının suallarını cavablandırmış, Qara Qarayevin xatirəsinə öz ifasını səsləndirmişdir.
Bədii hissədə Aydın Əzimovun əsərləri gənc pianoçu Leyla Əhmədxanovanın ifasında və audioformatda təqdim olunmuşdur.
 Tədbirlər
|
|
