1 oktyabr 2024
1 OKTYABR - BEYNƏLXALQ MUSİQİ GÜNÜ
QARA QARAYEVİN EV MUZEYİNİN AÇILIŞININ 6 İLLİYİ
1 oktyabr 2024-cü il tarixində Azərbaycan Musiqi Mədəniyyəti Dövlət Muzeyinin filialı olan Qara Qarayevin Ev Muzeyində 1 oktyabr – Beynəlxalq Musiqi Günü və muzeyin açılışının 6 illiyi münasibətilə tədbir keçirilmişdir.
Tədbir həm də 1975-ci ildən başlayaraq hər il oktyabr ayının 1-də bütün dünyada qeyd olunan Beynəlxalq Musiqi Gününə həsr olunmuşdur. Bu bayram bütün musiqiçilərin və bütün musiqisevərlərin bayramıdır.
Azərbaycan Musiqi Mədəniyyəti Dövlət Muzeyinin direktoru, sənətşünaslıq elmləri doktoru, Əməkdar mədəniyyət işçisi Alla Bayramova giriş sözü ilə çıxış etmiş, fəaliyyət göstərdiyi altı il ərzində muzeydə görülən işlər, əldə olunan nailiyyətlər və yeni materiallar barədə məlumat vermişdir. Qara Qarayevin qızı Züleyxa Bağırova-Qarayeva videotəbriklə xaricdən tədbirə qatılmışdır. Qara Qarayev ev-muzeyinin ekskursiyaçısı, gənc musiqişünas Ulduz Əliyeva Beynəlxalq Musiqi Günü və bu gözəl musiqi bayramının maarifləndirici əhəmiyyəti haqqında çıxış etmişdir. Onların çıxışı muzeyin fəaliyyətini əks etdirən slayd-şou ilə müşayiət olunmuşdur.
Tədbirdə musiqişünas, professor, Əməkdar incəsənət xadimi Zümrüd Dadaşzadə, musiqişünas, publisist və pedaqoq Raya Abbasova Qara Qarayevin Azərbaycan musiqisində möhtəşəm yeri, tövsiyyələri, bəstəkarlıq məktəbi haqqında çıxış etmiş, muzeyə fəaliyyətində uğurlar arzu etmişlər.
Tədbirin bədii hissəsində Azərbaycan Diplomatik Akademiyasının müəllimi, Beynəlxalq Müsabiqələr laureatları Humay Qasımzadə (f-no), Beynəlxalq müsabiqələr laureatları Osman Eyyublu (violin), Tofiq Şıxıyev (f-no), Ü.Hacıbəyli adına Bakı Musiqi Akademiyasının baş müəllimi Lalə Muxtarova (violin), Aynur İsgəndərli (vokal), Ü.Hacıbəyli adına Bakı Musiqi Akademiyasının konsertmeysteri, Əməkdar artist Nigar Məlikova (f-no), R.Behbudov adına 2 ¹ li 11 illik Musiqi Məktəbinin şagirdi Pərviz Bağırov (f-no), pianoçular - Respublika və Beynəlxalq müsabiqələr laureatları Ofeliya Dadaşova, Ləman Qulamova, Leyla Hüseynzadənin ifalarında Qara Qarayevin, Azərbaycan və dünya klassiklərinin əsərlərindən ibarət rəngarəng konsert proqramı təqdim olunmuşdur.
 Tədbirlər
|
|
