18 sentyabr 2024
NIYAZİ MUZEYİ - 30
18 sentyabr Azərbaycan Musiqi Mədəniyyəti Dövlət Muzeyinin filialı olan Niyazinin Mənzil Muzeyinin açılışının 30-cu ildönümüdür.
Bu münasibətlə 19 sentyabr tarixində Niyazinin Mənzil Muzeyində təntənəli tədbir keçirilmişdir. Tədbirdən əvvəl qonaqlar foyedə yeni hazırlanmış “Muzeyin tarixindən”adlı fotosərgi ilə tanış olmuşlar.
Tədbir Azərbaycan xalqının Ümummilli lideri Heydər Əliyevin 1994-cü il sentyabr ayının 18-də muzeyin açılışındakı nitqinin videoyazısı ilə başlamışdır.
Azərbaycan Musiqi Mədəniyyəti Dövlət Muzeyinin direktoru, sənətşünaslıq elmləri doktoru, Əməkdar mədəniyyət işçisi Alla Bayramova giriş sözü ilə açmış, Niyazinin Mənzil Muzeyinin müdiri, Əməkdar mədəniyyət işçisi Rza Bayramov muzeyin fəaliyyət göstərdiyi illər ərzində görülən işlər, əldə olunan nailiyyətlər haqqında çıxış etmişdir. Onların çıxışı muzeyin zəngin kolleksiyaları əsasında hazırlanmış slayd-şou ilə müşayiət olunmuşdur. Tədbir iştirakçıları həmçinin muzeyin 30 illik yubileyi münasibətilə təkrar nəşr edilmiş "Niyazinin Mənzil Muzeyi-30" bukleti (Azərbaycan, rus və ingilis dillərində) ilə tanış olmuşlar.
Azərbaycan Mədəniyyət İşçiləri Həmkarlar İttifaqı Respublika Komitəsinin sədri Adil Atakişiyev muzeyin rəhbərliyi və əməkdaşlarını Fəxri fərman və pul mükafatı ilə təltif etmişdir.
Tədbirdə "Azərbaycan Dünyası" beynəlxalq jurnalının baş redaktoru, "Dədə Qorqud" Milli Fondunun yaradıcısı və prezidenti Eldar İsmayılov, Dünya Azərbaycanlılarının Həmrəyliyi Cəmiyyətinin sədri Tofiq Əlizadə, "Carçı" jurnalının baş redaktoru Gülnarə Əmirquliyeva, Bülbülün Ev Muzeyinin direktoru Fərqanə Cabbarova, Niyazinin qohumu Sahib Qədimov təbrik çıxışları edib muzeyə gələcək fəaliyyətində uğurlar arzu etdilər.
Bədii hissədə Azərbaycan Dövlət Akademik Opera və Balet Teatrının artistləri Mirəli Sarızadə, Gülzar Ramizli, Məhəbbət Səfərov, Səma Həmzəyeva, Əməkdar artist Elxan Mansurov, Nüşabə İsa, Azərbaycan Dövlət Akademik Musiqili Teatrının solisti Eleanora Mustafayeva, Fidan Əliyeva, Ü.Hacıbəyli adına Bakı Musiqi Akademiyasının baş müəllimi, Beynəlxalq müsabiqələr laureatı Lalə Muxtarova, konsertmeysteri Beynəlxalq müsabiqələr laureatı Nuranə Qurbanova, Azərbaycan Milli Konservaroriyası nəzdində Musiqi Kollecinin müəllimi, Respublika və Beynəlxalq müsabiqələr laureatı Abbas Abdullazadənin ifalarında Ü.Hacıbəylinin, Niyazinin və başqa Azərbaycan bəstəkarlarının əsərlərindən ibarət rəngarəng konsert proqramı təqdim olunmuşdur.
Tədbirin qonaqları Azərbaycan Respublikası Mədəniyyət Nazirliyinin, Bakı Musiqi Akademiyasının, Bəstəkarlar İttifaqının nümayəndələri, Bakı muzeylərinin əməkdaşları və başqaları olmuşlar.
 Tədbirlər
|
|
