20 avqust 2024
NİYAZİ - 112
20 avqust 2024-cü il tarixində Azərbaycan Musiqi Mədəniyyəti Dövlət Muzeyinin filialı olan Niyazinin Mənzil Muzeyində görkəmli dirijor və bəstəkar, SSRİ Xalq artisti, Sosialist Əməyi Qəhrəmanı, SSRİ Dövlət mükafatları laureatı, C.Hehru adına Beynəlxalq mükafat laureatı Maestro Niyazinin anadan olmasının 112-ci ildönümünə həsr olunmuş tədbir keçirilmişdir.
Muzeyin qonaqları, tədbir iştirakçıları Niyazinin doğum günü münasibətilə muzeyin foyesində hazırlanmış "NİYAZİ - 112" yeni sərgisi ilə tanış olmuşlar.
Tədbir Azərbaycan xalqının Ümummilli lideri Heydər Əliyevin Maestro Niyazi haqqında xatirələrinin videoyazısı ilə başlamışdır.
Giriş sözü ilə Azərbaycan Musiqi Mədəniyyəti Dövlət Muzeyinin filialı olan Niyazi Mənzil Muzeyinin müdiri, Əməkdar mədəniyyət işçisi Rza Bayramov çıxış etmişdir. Tədbirdə bəstəkar, Üzeyir Hacıbəyli adına Bakı Musiqi Akademiyasının professoru, Xalq artisti Azər Dadaşov, jurnalist-tədqiqatçı, sənətşünaslıq üzrə fəlsəfə doktoru, Əməkdar mədəniyyət işçisi Əlisəftər Hüseynov, şairə, "Qızıl qələm" mükafatçısı Nazlı Yazar unudulmaz sənətkarın Azərbaycan musiqi mədəniyyətinin zənginləşməsi və təbliği yolunda gördüyü əvəzsiz xidmətlərindən danışmışlar. Bütün çıxışlar Azərbaycan Musiqi Mədəniyyəti Dövlət Muzeyinin zəngin kolleksiyaları əsasında hazırlanmış slayd-şou ilə müşayiət olunmuşdur.
Tədbirin bədii hissəsində Azərbaycan Dövlət Akademik Opera və Balet Teatrının solisti, Üzeyir Hacıbəyli adına Bakı Musiqi Akademiyasının professorları, Xalq artisti Gülnaz İsmayılova (vokal), Əməkdar artistlər Tövhə Babayeva (violin), Elnarə Kəbirlinskaya (f-no), dosenti, Əməkdar artist İlahə Sadıqzadə (f-no),baş müəllim, Respublika və Beynəlxalq müsabiqələr laureatı Lalə Muxtarova (violin), konsertmeyster Beynəlxalq müsabiqələr laureatı Nuranə Qurbanova (f-no), musiqişünas və vokalçı Sevinc İbrahimova, Azərbaycan Milli Konservatoriyasının müəllimi, Muğam Müsabiqəsinin laureatı Nüşabə Kərimova, muzeyin Qədim Musiqi Alətləri Ansamblınının kiçik heyəti (Ansamblın bədii rəhbəri və konsertmeysteri Xalq artisti Munis Şərifovdur), Azərbaycan Milli Konservatoriyası tərkibində Respublika İncəsənət Gimnaziyasının X sinif şagirdi, Respublika və Beynəlxalq müsabiqələr laureatı Məhəmməd Allahverdiyevin(f-no) ifalarında Niyazinin və Azərbaycan bəstəkarlarının əsərlərindən, xalq musiqisindən ibarət konsert proqramı təqdim olunmuşdur.
Bu gün Niyazinin Mənzil Muzeyində "Açıq qapı günü" elan olunmuşdur.
Tədbirdə Azərbaycan Respublikası Mədəniyyət Nazirinin müşaviri Cahangir Səlimxanov, İncəsənət və qeyri-maddi mədəni irs şöbəsinin müdiri Sevil Kərimova, muzey işi sektorunun əməkdaşları, Niyazinin qohumu Sahib Qədimov, musiqi ictimaiyyəti, Bakı muzeylərinin nümayəndələri iştirak etmişlər.
 Tədbirlər
|
|
