2 avqust 2024
2 avqust 2024-cü il tarixində Azərbaycan Musiqi Mədəniyyəti Dövlət Muzeyinin filialı olan Niyazinin Mənzil Muzeyində görkəmli dirijor və bəstəkar, SSRİ Xalq artisti, Sosialist Əməyi Qəhrəmanı, Azərbaycan və SSRİ Dövlət Mükafatları Laureatı, C.Hehru adına Beynəlxalq Mükafat Laureatı Niyazinin vəfatının 40-cı ildönümünə həsr olunmuş "Maestro Niyazi – 40 il xatirələrdə" tədbiri keçirilmişdir.
Tədbiri giriş sözü ilə Azərbaycan Musiqi Mədəniyyəti Dövlət Muzeyinin direktoru, sənətşünaslıq elmləri doktoru, Əməkdar mədəniyyət işçisi Alla Bayramova açmışdır.
"Maestro Niyazi – 40 il xatirələrdə" tədbirində muzeyin şöbə müdiri Xanım Abdinova, böyük elmi işçisi Əzirə Abdullayeva, jurnalist-tədqiqatçı, sənətşünaslıq üzrə fəlsəfə doktoru, Əməkdar mədəniyyət işçisi Əlisəftər Hüseynov, Fransada yaşayan azərbaycanlı pianoçu, Fransa Beynəlxalq Musiqi Akademiyasının direktoru, Azərbaycan Respublikasının Əməkdar artisti Adilə Əliyeva, Niyazinin qohumu Sahib Qədimov Maestro Niyazinin Azərbaycan musiqi mədəniyyətinin zənginləşməsi və təbliği yolunda gördüyü əvəzsiz xidmətlərindən danışmışlar. Bütün çıxışlar Azərbaycan Musiqi Mədəniyyəti Dövlət Muzeyinin zəngin kolleksiyaları əsasında hazırlanmış slayd-şou ilə müşayiət olunmuşdur. Azərbaycan Milli Konservatoriyası elmi tədqiqat laboratoriyasının baş elmi işçisi, sənətşünaslıq üzrı fəlsəfə doktoru Fazilə Nəbiyeva Azərbaycan Musiqi Mədəniyyəti Dövlət Muzeyinin arxiv materiallarının, Niyazi ilə bağlı bir sıra məqamların da yer aldığı və yeni nəşr olunmuş "Aqşin Əlizadə - xatirələr işığında" kitabını muzeyə hədiyyə etmişdir. Tədbirdə Maestro Niyazi haqqında görkəmli musiqi xadimlərinin xatirələri səsləndirilmiş və videoxatirələr nümayiş edilmişdir.
Tədbirin bədii hissəsində Qara Qarayev adına Azərbaycan Dövlət Kamera Orkestrinin artistləri, Respublika və Beynəlxalq müsabiqələri laureatı Toğrul Abdullayev (violin), Beynəlxalq müsabiqə laureatı Aydan Rüstəmzadə (violonçel), Azərbaycan Dövlət Mədəniyyət və İncəsənət Universitetinin tələbəsi, Beynəlxalq müsabiqə laureatı Ülkər Məmmədova(f-no), Ü.Hacıbəyli adına Bakı Musiqi Akademiyasının müəllimi, Beynəlxalq müsabiqə laureatı Güllübəyim Məmmədova (vokal), magistr tələbəsi Ülkər Məmmədova (f-no), musiqişünas və vokalçı Sevinc İbrahimovanın ifalarında Niyazinin xatirəsinə həsr olunmuş musiqi proqramı təqdim olunmuş, Maestronun idarəsi ilə konsertlərdən videokadrlar nümayiş olunmuşdur.
Musiqi ictimaiyyəti, Azərbaycan Mədəniyyət İşçiləri Həmkarlar İttifaqı Respublika Komitəsinin sədri Adil Atakişiyev və təşkilat şöbəsinin müdiri Çingiz İbrahimov, Bakı muzeylərinin əməkdaşları, KİV nümayəndələri tədbirin qonaqları olmuşlar.
 Tədbirlər
|
|
