23 aprel 2024
23 aprel 2024-cü il tarixində Azərbaycan Musiqi Mədəniyyəti Dövlət Muzeyinin filialı olan Qara Qarayevin Ev Muzeyində Bülbül adına Orta İxtisas Musiqi Məktəbinin 95 illik yubileyinə həsr olunmuş tədbir keçirilmişdir.
Azərbaycan Musiqi Mədəniyyəti Dövlət Muzeyinin direktoru, sənətşünaslıq elmləri doktoru, Əməkdar mədəniyyət işçisi Alla Bayramova tədbirdə giriş sözü ilə çıxış etmişdir. Qara Qarayevin qızı Züleyxa Qarayeva-Bağırova təhsil illəri, sevimli müəllimləri haqqında xoş xatirələrini tədbir iştirakçıları ilə bölüşmüşdür.
Tədbirdə tanınmış publisist, musiqişünas və pedaqoq Raya Abbasova Bülbül adina Orta İxtisas Musiqi Məktəbinin yaranmasi və ifa olunan əsərlər haqqında dinləyicilərə ətraflı məlumat vermişdir.
Tədbirin bədii hissəsində Bülbül adına Orta İxtisas Musiqi məktəbinin şagirdlərinin ifasında Qərbi Avropa, rus və Azərbaycan bəstəkarlarının əsərlərindən ibarət konsert proqramı təqdim olunmuşdur. Konsert proqramı məktəbin tarixi yolunu əks etdirən slayd-şou ilə müşayiət olunmuşdur.
Sonda muzeyin direktoru Alla Bayramova Bülbül adına Orta İxtisas Musiqi Məktəbinin kitabxanasına və konsertin ifaçılarına muzeyin nəşri olan not kitabları, disklər hədiyyə etmişdir. Məktəbin direktoru, Xalq artisti, dirijor Teymur Göyçayev gənc istedadları gözəl ifalarına görə təbrik etmiş, muzeyə minnətdarlığını bildirmişdir
 Tədbirlər
|
|
