28 may 2023
28 MAY - MÜSTƏQİLLİK GÜNÜ MÜNASİBƏTİLƏ "VƏTƏNİM AZƏRBAYCANDIR" ADLI TƏDBİR
26 may 2023 il tarixində Azərbaycan Musiqi Mədəniyyəti Dövlət Muzeyində 28 May - Müstəqillik Günü münasibətilə "Vətənim Azərbaycandır" adlı tədbir keçirilmişdir.
28 May - Müstəqillik Günü tariximizin ən şanlı və parlaq səhifələrindəndir.Yüz beş il bundan əvvəl - 1918-ci il mayın 28-də Azərbaycan Xalq Cümhuriyyətinin yaradılması ölkəmizin həyatına böyük tarixi hadisə kimi daxil oldu. Müstəqil, azad, demokratik respublika qurmaq məqsədini qarşıya qoyan Azərbaycan Xalq Cümhuriyyəti cəmi 23 aylıq fəaliyyəti dövründə xalqın milli mənlik şüurunu özünə qaytardı, onun öz müqəddəratını təyin etməyə qadir olduğunu nümayiş etdirdi.
XX əsrin sonlarında yenidən müstəqilliyinə qovuşan Azərbaycan öz suverenliyini qoruyub saxlamağı bacardı. Yenidən hakimiyyətə qayıdan ümummilli lider Heydər Əliyev Azərbaycan dövlətçiliyinin qorunması üçün qətiyyətli tədbirlər gördü, ölkədə davamlı ictimai-siyasi sabitliyi bərqərar etdi. Beləliklə, Heydər Əliyevin şah əsəri olan müasir müstəqil Azərbaycan dövləti quruldu və sürətli inkişaf yoluna qədəm qoydu.
Müstəqil daxili və xarici siyasət həyata keçirən Azərbaycanın yalnız regionda deyil, beynəlxalq miqyasda söz sahibi olan bir ölkə kimi tanınması, Azərbaycan Prezidentinin rəhbərliyi ilə müəyyənləşdirilən və həyata keçirilən hərtərəfli düşünülmüş, müdrik çoxşaxəli siyasət, qazanılmış uğurlar əminliklə söyləməyə əsas verir ki, Azərbaycan dövlət müstəqilliyini bir də heç vaxt əldən verməyəcək, müstəqillik əbədi olacaq.
Tədbir Azərbaycan Respublikası Dövlət Himninin ifası ilə başlanmışdır.
Azərbaycan Musiqi Mədəniyyəti Dövlət Muzeyinin direktoru, sənətşünaslıq elmləri doktoru, Əməkdar mədəniyyət işçisi Alla Bayramova giriş sözü ilə çıxış etmişdir. Daha sonra "28 May Müstəqillik Günüdür" videoçarxı nümayiş edilmişdir. Tədbir "Nur" Uşaq xorunun (dirijor və bədii rəhbər Mələk Vəlizadə) və Qara Qarayev adına Mərkəzi İncəsənət Məktəbinin şagirdlərinin ifalarında konsert proqramı ilə davam etmişdir.
Tədbir iştirakçıları Azərbaycan Respublikasında "Heydər Əliyev İli" münasibətilə Azərbaycan Musiqi Mədəniyyəti Dövlət Muzeyinin zəngin kolleksiyaları əsasında hazırlanmış "Heydər Əliyev və Azərbaycan musiqi mədəniyyəti" adlı sərgi ilə tanış olmuşlar.
 Tədbirlər
|
