29 sentyabr 2022
GÖRKƏMLİ BƏSTƏKAR, AZƏRBAYCAN BƏSTƏKARLAR İTTİFAQININ SƏDRİ, XALQ ARTİSTİ, PROFESSOR, ŞÖHRƏT ORDENLİ, UNESCO-nun SÜLH ARTİSTİ FİRƏNGİZ ƏLİZADƏ İLƏ YARADICILIQ GÖRÜŞÜ
29 sentyabr 2022-ci il tarixində Azərbaycan Musiqi Mədəniyyəti Dövlət Muzeyində Beynəlxalq Musiqi Günü ərəfəsində görkəmli bəstəkar, Azərbaycan Bəstəkarlar İttifaqinin sədri, Xalq artisti, professor, Şöhrət ordenli, UNESCO-nun Sülh artisti Firəngiz Əlizadə ilə yaradıcılıq görüşü keçirilmişdir.
Azərbaycan Musiqi Mədəniyyəti Dövlət Muzeyinin direktoru, sənətşünaslıq elmləri doktoru, Əməkdar mədəniyyət işçisi Alla Bayramova giriş sözü ilə çıxış etmişdir.
Tədbirdə ZEYNJ studiyasının istehsalı olan “Firəngiz Əlizadənin yaradıcılıq səhifələri” sənədli filminin təqdimatı keçirilmişdir.
Filmin nümayişindən sonra Azərbaycan Respublikası Mədəniyyət nazirinin birinci müavini Elnur Əliyev, Milli Məclisin deputatı Aydın Mirzəzadə, Xalq artisti, tarzən Ramiz Quliyev, Bakı Musiqi Akademiyasının prorektoru, Əməkdar incəsənət xadimi Gülnaz Abdullazadə çıxış edərək film haqqında təəssüratlarını bölüşmüş, Firəngiz Əlizadənin Azərbaycan musiqi mədəniyyətinin inkişafında və təbliğində müstəsna xidmətlərindən danışmışlar. Azərbaycan Respublikasının Əməkdar artisti Rəna Rzayeva Firəngiz Əlizadənin “Music for Piano” əsərini ifa etmişdir. Sonda Firəngiz Əlizadə gələcək yaradıcılıq planlarından danışmışdır.
Bu gün “Firəngiz Əlizadənin yaradıcılıq səhifələri” sənədli filminin təqdimatı çərçivəsində Milli Məclisin deputatı Aydın Mirzəzadə muzeyin ekspozisiyası ilə tanış olmuşdur.
 Tədbirlər
|
