18 avqust 2021
NİYAZİ - 109
20 avqust 2021-ci il tarixində məşhur Azərbaycan dirijoru və bəstəkarı, SSRİ Xalq artisti, Azərbaycan və SSRİ Dövlət mükafatları laureatı, C.Nehru adına Beynəlxalq Mükafat laureatı, Sosialist Əməyi Qəhrəmanı, Hacıbəyovlar nəslinin parlaq nümayəndəsi Maestro Niyazinin 109 yaşı tamam olur.
Bununla əlaqədar olaraq həmin tarixdə saat 11:00-da Azərbaycan Musiqi Mədəniyyəti Dövlət Muzeyinin və onun filialı Niyazinin Mənzil Muzeyinin əməkdaşları və ictimaiyyətin nümayəndələri Fəxri xiyabanda Niyazinin məzarını və Bakı şəhərindəki abidəsini ziyarət edəcəklər.
Saat 15:00-da isə muzeydə Heydər Əliyev Fondu tərəfindən “Əbədi imzalar” layihəsi çərçivəsində nəşr olunmuş görkəmli bəstəkar və dirijor Niyazinin əsərlərindən ibarət 7 məcmuə qonaqlara təqdim olunacaqdır.
Tədbirdə dahi Azərbaycan şairi və mütəfəkkiri Nizami Gəncəvinin 880 illiyi çərçivəsində təşkil olunacaq konsertdə Nizami poeziyasından ilhamlanaraq Niyazi və görkəmli Azərbaycan bəstəkarlarının yazdıqları əsərlər səslənəcəkdir.
Həmçinin həmin gün muzeydə “Açıq qapı” günü elan olunacaq, gün ərzində ziyarətçilərə Niyazi haqqında müxtəlif illərdə çəkilmiş sənədli filmlər, videokonsertlər, musiqisinin müəllifi olduğu filmlər nümayiş ediləcək.
 Rubrikalar
|
